بهار عشقیم اولاندان خزان گرفتاری
اَسوب سموم ستم سولدوروبدی گلزاری
نه واردی گُلده صفا نه ترانه بلبلده
نه بیر صبا گتورور عطرِ طرّه ی یاری
منیمده قلبیمی غم چوخ سیخوب فشاره سالوب
او شدّتیله که سالمیشدی تنگه اخیاری
دئدیم گیدوم گینه اوز دردیمی حسینه دیوم
او اهلِ دردیدی وار درده الده معیاری
ایله فشاره سالوبلار او شاهی اهلِ نفاق
علاوه قتلینه مروانون اولدی اِخطاری
امام ترک ایلدی جدّینون مدینه سینی
ایدوب وطن اوزینه کوه و دشت و اصحاری
گلوبدی کعبیه، الله ایوین ایده مأمن
اولوبدی مکّه ده دورد آی وقوفِ اجباری
امامه اولمادی مأمن او امن بیتُ الله
که اوردا قاتل اگر اولسا اولماز آزاری
بنی امیّه ایدوبلر امامه عرصه نی تنگ
ویروبدی امر رحیله او شاه ناچاری
امیرِ عشق و وفا کعبه دن ایدوب حرکت
گیدور دیارِ بلایه، بلا خریداری
اورکده جذبه باشیندا هوای وصلِ نگار
گیدور زیارت ایده کربلاده دلداری
خلیل حجّینه دل حجّینی ویروب ترجیح
قطاری چکدی منایه او عشق سالاری
شهید اولماقا شوقیله طیّ راه ایلوب
نثارِ ثارینه وار حق یولوندا ایثاری
خیالِ حجّ شهادتله باغلیوب احرام
ایدوب ذبیح شبیهِ رسولِ مختاری
که خائفا" یَتَرَقَّب ایدوبدی کعبه نی ترک
گجیدی یا که گونوز اولدی عشق زوّاری
فخرج منها خائفا یترقب......
اشاره به آیه ۲۱ سورهء مبارکهء قصص
گوتوردی اهل و عیالین عراقه ایتدی سفر
بو فکریله حرم ایتسون حریمِ اغیاری
او کاروانِ بلا کربلایه باشلادی یول
که تنگیدی اونا یکسر جهانون اقطاری
گیدر تجارته جان نقدی الده کالاسی
او چولده گرمیدی گویا که عشق بازاری
یول اوسته بیر به بیر اصحابین انتخاب ایلر
ایدر قبول مسلمانی، اهلِ زنّاری
مسیرِ راهیده هر کیمده اولسا عشق و وفا
دوشر کمنده اولان بذل جان سزاواری
اولار که دللری آماده ی هدایتیدی
گلوب اولاردی او شاهون اولار مددکاری
وهب آدیندا مسیحی جوانِ صحرا گرد
سعادت اولدی الین دوتدی بختِ بیداری
اوزیدی بیرده عروسیدی بیرده اوز آناسی
اولاردی چولده شکاریله چون سر و کاری
همان او عادتِ معهودیله گیدوب بیر گون
گینه شکاره اولوب امری امرِ تکراری
قایتدی خیمه سینه استراحته ناگاه
باخوب محیطینه آشفته اولدی افکاری
دئدی آناسینه بو خیمه نون یری آیا
اولوب عوض منه کشف ایله سن بو اَسراری
ندور بو چشمه ی جاری که بوردا سو یوخودی
روان اولوب چوله جلب ایلیوبدی افکاری
دئدی بو خیمه ده سندن سورا اوتورموشدوق
اولوب مشاهده بیر کاروان نموداری
انیر قافله نون بیر عرب رجالیندن
اصیل بیر آقا، دور و برینده انصاری
گلوب دایاندی بیزیم خیمه نون مقابلینه
او مرکب اوسته منی ایتدی محوِ دیداری
او لحظه ووردی یره نیزه سین وقاریله
گلوب گیچوب هامی افراد یاور و یاری
ایله آقا، ایله انسانِ باوقار اولماز
ایدوبدی حالیمی آشفته طرزِ رفتاری
گوزوم تجلّی طوری گوروب جمالیندن
ایدوبوی محوِ لقا مین کلیمی انواری
همینکه قافله گیتدی اودا دوتوب تصمیم
که رهسپار اولا راهِ وصالِ دلداری
گوتوردی نیزه نی یردن او شهریارِ عرب
او نیزه نین اثریندن بو سو اولوب جاری
اولار که بیر نچه ساعت کوچوب گیدوبدی ولی
شمیمی ایلوری شرمنده مشکِ تاتاری
همینکه باخبر اولدی وهب ندور جریان
تعجّبیله تلاقی ایدوب او اخباری
بیر آز دوشوندی بو قدرت بو خارق العاده
محالدور ایده عادی بشر بو کرداری
دئدی بشرده بو قدرت بو اقتدار اولماز
بشر محالیدی آسان ایده بو دشواری
خدایه آند اولا عیسی ابن مریمین ایشیدی
اگر او نیزه نین اولسا بو چشمه آثاری
دورون ایاقه اوتورماق دگل بیزه جائز
که واجب ایلدی تعقیبینی بیزه باری
اساسینی گوتوروب جمع ایدوبدی خیمه سینی
گیدر زیارت ایده تا او شاهِ ابراری
گلوب یتشدی او ساعت که ظهرِ عاشورا
بلا او نقطه ی عشقین اولوبدی پرگاری
منای عشقین او چولده سوسوز فدالرینون
آخوبدی قانی، آچوب گل او تربتین خاری
او لحظه لردی که یالقوز قالوب امامِ غریب
نه بیر حمایت ایدن وار نه یاور و یاری
یارالی مرکبون اوستونده نیزیه دایانوب
ایدر هدایته دعوت او قومِ جبّاری
دوتوبدی مرکزِ میدانی نورِ وجهُ الله
سحر او لشکره ایستر ایده شب تاری
وروبلا آنّینا یاره دولوبدی قان گوزونه
ایدر جهانی مسخّر او چشمِ سحّاری
دییر که وار بیری آیا بیزه ایده نصرت
نجاتِ امنه چکه اهلِ بیتِ اطهاری
آناسی تا وهبون گوردی شاهِ عطشانی
او حالتیله ایدوب لعن او قومِ اشراری
دئدی اوغول بو همان شهریاریدور، ایمدی
قالوب کمکسیز اولوب دشمنون گرفتاری
بو اهلِ عشق که بو دشتی ایلیوبله منا
گوزل طریقیله اجرا ایدوبله پیکاری
او وقت اوز سودومی من سنه حلال ایلرم
شهید ایده سنی بو قوم ننگیدن عاری
بو امر تک نه منیم خواهشیمدی اولما ملول
عروسونده شهید اولماقا وار اِصراری
اوغول نه من و نه بو همسرون اولور مانع
وظیفه دور هامی اولسون بونون فداکاری
کومکلری توکلوب تپراقا قالوب یالقوز
وروبدی قلبینه دشمن جراحتِ کاری
تعجّبم هامی حیراندی استقامتینه
بو قدر درد و بلا یوخدی بیر هواداری
شکست و عجز جمالیندن اولموری مشهود
اولور بلا یتیشنده جمالی گلناری
ئولوب کومکلری قارداشلاری، جوان اوغلی
فقط اوزی تک و تنها قالوب بو مقداری
محالدور ایده ترسیم هیبتین او شهین
قلم اگر هامی دنیانین اولسا اشجاری
دوروبدی مرکزِ میداندا چوخ وقاریله
دوتوب صلابتی یکسر قلوبِ کفّاری
الینده قائمه ی ذوالفقارِ آتشبار
اولوبدی حامل اونا مرکبِ سبکباری
سنوبدی لشکری یوخ بیر نفر حمایت ایدن
عَلم یاتوبدی باتوب قانینه علمداری
وهب او لحظه سنه حقّیمی حلال ایلرم
گیدوب شهید اولاسان درک ایله بو هشداری
گرکدی باشیله جانیله خدمت ایلیه سن
سودوم حلال اولا ای نخلِ عمرومون باری
باخاندا قلبیمه قلبونده وار نه هنگامه
گوزوم گورور اونا یوخدور نیاز اظهاری
او دم حضورِ امامه مشرّف اولدی وهب
قبولِ دین و شهادتدن اولدی تذکاری
زهی سعادت او آز وقته شرکی ترک ایلدی
ایدوبدی عطف وجودین هدایته ساری
آناسی امر ایلمشدی گیدوب شهید اولسون
که جلب ایدر او شهادت رضای داداری
اجازه ایستدی گتسون نثارِ ثار ایلسون
که آبرنگ اولا دین نقشینه اونون ثاری
محبّتیله بویوردی امام اولماز بو
قوناق سوز بیزه سیز، ترک ایله بو گفتاری
آنان چادردا سنه منتظردی یول گوزلور
علاوه همسرون اولماز بو امر واداری
شهادتیمدی منیم تک بو لشکره منظور
بیر آیری شخصیله یوخ دشمنون سر و کاری
خلاصه ایلدی اصرار آلدی رخصتِ جنگ
ایدوبدی شیر صفت قصد او قومِ خونخواری
کمالِ قدرتیله جنگ ایدوب اولوب مجروح
کسیلدی اللری، قانه بویاندی رخساری
آناسی باخدی دئدی ای اوغول ایوین آباد
اولوب شهادتینه بو رضایت اقراری
یازار بو مطلبِ جانسوزی مُنتهی الآمال
نثارِ نُقل ایلیوب خامه ی گهرباری
عروس گلدی گوروب قان دولوب ایکی گوزینه
قویوب جمالینی قانلی جمالینه آری
او دمده شمر ایدوب اوز غلامینی مأمور
شهید ایده وهبیله او باوفا یاری
غلام شمر اونا بیر دمیر عمود ویروب
همان عمودیله ختم اولدی عمر طوماری
آقا خانم ایکیسی گیتدی جنّته باهم
یول آچدی روضه ی رضوانه عشق سرشاری
نچه نفر که امامین کمکلرینندن او گون
ویروبدی اللرینی اولدی دین نگهداری
بیری امام حسن(ع) یادگاری عبدالله
سولوبدی آرتیروب امّا صفای گلزاری
الین کسوبله، لطیف آنّینا دگوب بیر اوخ
آخوبدی قرمزی قان دولدی چشمِ خونباری
بیریسید
- سه شنبه
- 17
- مرداد
- 1402
- ساعت
- 01:16
- نوشته شده توسط
- یوسف اکبری
ادامه مطلب
