دیدی عم اوغلی علی بزم رازه گیتمه لیم
حضور اقدس پروردگاره گیتمه لیم
دیدی بو سوزلریله کونی یاندیروب یاخما
دیدی اورک سوزی گلمز شماره گیتمه لیم
دیدی سنیدون امیدیم، چکوب بیر آه دیدی
بو دردی یادیمه سالما دوباره، گیتمه لیم
نه دویموشام بالالاردان نه ده علی سندن
نه ایلیوم کسیلوب راه چاره گیتمه لیم
مسافرم سفر اوستونده حالیمی پوزما
سرشک چشمیوی توکمه عذاره گیتمه لیم
چتیندی آیریلا سندن بو روح مجروحیم
ولی چکور آپارور دلده یاره گیتمه لیم
دیدی گل اگلش عم اوغلی ایدوم وصیّتیمی
چکیلمه بیر نچه لحظه کناره گیتمه لیم
بتولی آخِر عمرونده گل حلال ایله
فراق وقتیدی آیری دیاره گیتمه لیم
گجه زمانی ویروب غسلیمی کفن ایله
غریبه لر کیمی تاپشور مزاره گیتمه لیم
غمیمده قویما سولا نوشکفته غنچه لریم
خزان یلی توخونا لاله زاره گیتمه لیم
عم اوغلی غسلیمی پیراهنیله ویر که گوزون
ساتاشماسون بو تن زخمداره گیتمه لیم
نه بی نشان اولی من تک نه سن کیمی مظلوم
اولیدی اُفّ بیله روزگاره گیتمه لیم
اجل تری دوزولوب آنّینا آخوب گوزلر
سوزون دینمدی قیلدی اشاره گیتمه لیم
دولاندیروب گوزینی حسرتیله بیر باخدی
شهادتِینی دیوب تا که گوزلری آخدی
دیدی اورک سوزونی یاره یار یومدی گوزون
علیده قویمادی صبر و قرار یومدی گوزون
او بزم رازیده پروانه یاندی آغلادی شمع
یتیشدی باشه غم انتظار یومدی گوزون
نه قدر سسلدی زهرا عم اوغلوام گوزون آچ
جواب گلمدی مظلوم وار یومدی گوزون
چاغوردی زینبی گل عمریمون چراغی سونور
وصیّت ایلدی بی اختیار یومدی گوزون
اجل پیاله سی غم باده سیله مالامال
دگوب مشامینه اولدی خمار یومدی گوزون
باخوب بالالارا حسرتله چکدی دلدن آه
عذاره اشکینی قیلدی نثار یومدی گوزون
گوروب سولوب سارالان گللرین پریشان حال
اولوب بو منظره دن اشکبار یومدی گوزون
حسین یانور حسن آغلور غریبه عالمدی
باخوب دوزنمدی اول داغدار یومدی گوزون
خزان لهیبی گلوب سولدی فاطمی گللر
پوزولدی رونق گلشن بهار یومدی گوزون
به سان شمع خموش اولدی لیک درد دلین
اُلونجه ایلمدی آشکار یومدی گوزون
نماز آغلادی سجّاده و دعا یاندی
اودمکه عاکفه ی روزگار یومدی گوزون
بیر عمر شمع کیمی یاندی تا خموش اولدی
فروغ جان و دل شهریار یومدی گوزون
عفاف و عصمت و تقوا اولوب شهید گوروب
یگانه مظهر شان و وقار یومدی گوزون
بویوردی زینبه گل زینبیم آنان گیدوری
حضور یاره اورک یاره باغری قان گیدوری
گلون سالون یولا بو خسته دل مسافروزی
گورون نه غصّه لی گمنام و بی نشان گیدوری
آنا جنازه سینون آلدی دوره سین بالالار
ویروبله سس سسه یردن گویه فغان گیدوری
علی باخور یانور آغلور، فغان ایدور زینب
عذاره اشکی اولوب سیل تک روان گیدوری
ملک فلک هامی عرشیله فرش قان آغلور
توککور سرشکینی جبریل نوحه خوان گیدوری
گلوب تموّجه دریای حوریان بهشت
جنانه یوز چووروب معنی جنان گیدوری
علی اولوبدی صبائیله همنوا بو گجه
او خسته پیکریله روحی بی گمان گیدوری
گیدور بو خسته مسافر همیشه لیق سفره
جهانی ترک ایلیوب جان بیر جهان گیدوری
چمن یانوب، سارالوب یاسمن، سولوب لاله
بهار عمری یتوب باشه باغبان گیدوری
سزادی گویده یازا اشک دیده ی حورا
دگل بو فاطمه تابوت ایچینده جان گیدوری
غروب وقتی غروب ایلیوب غریبانه
بیر آی که آردیجا اولدوز بیر آسمان گیدوری
بو گون علینون ایوینده غریبه غوغادی
نه فاطمه که بیر عالمجه کاروان گیدوری
بو گل اگرچه سارالدی بهار عمرونده
ولی مدینه بویی باغ و گلستان گیدوری
اگرچه دردینی بولدورمیوب ولی دلده
بیر عالمین غمینی ایلیوب نهان گیدوری
گجیله محمل زهرا بقیعه یولّاندی
بو غصّه دن دل مولا یانوب الولاندی
غرض گوتوردوله یورقون یارالی زهرانی
گجه بقیعیده دفن ایلسونله پنهانی
مدینه خلوت و خاموش و بی فروغ و سکوت
جهانی چولقالیوبدی حجاب ظلمانی
ستاره لر سپوری لمعه لمعه نقره ی اشک
یولا سالوبلا حقیقتده ماه تابانی
سکوت محضیدی یکسر مدینه شهری ولی
گیدور که بسلیه آرامشینده طوفانی
توکور سرشکینی زهرا غمینده دیده ی شب
صباده زمزمه ایلور حدیث هجرانی
گجه زمانیدی گوزلر یاتوب نه عالمدی
بقیعه حمل ایلیولّر غریب دورانی
علی ولایتی حمل ایلوری نه فاطمه نی
علی تشیّعی تشییع ایدور نه زهرانی
نه بدرقه نجه عالم که گورمیوبدی جهان
بیله غریبی، بو جمعیّت پریشانی
گلور بو زمزمه راحت یاتون مدینه لیلر
قوتاردی فاطمه باغلاندی بیت الاحزانی
هامی یاتان گجه لر آغلیوب ولی بو گجه
یاتوبدی فاطمه آغلار قویوبدی دنیانی
یانور هارای چکور آی، سیزیلدیر اولدوزلار
صباده چاک ایلیور غصّه دن گریبانی
گجه نسیمی سیزیلدور گلور نه زمزمه سی
بیر عالمین بو گیدن روحیدور علی جانی
نه گل یاتوب نده سسدن دوشوبدی بلبل لر
غبار غم بوریوب گلشن و گلستانی
جهان جهان اولالی گورمیوبدی گورمیه جاق
بو کاروانی بیله مجمع پریشانی
سنیله فاطمه روح و روانی دفن ایدورم
خدا بولور که دل مرتضانی دفن ایدورم
یات ای ولایتیمون خسته دل شهیده سی یات
سنیله جوهر عشق و ولانی دفن ایدورم
بو سنسن اللریم اوستونده یاتموسان زهرا
و یا علیدی، امام زمانی دفن ایدورم
منه جهاندا بو غمدن بویوک ملال اولماز
گوزوم باخا باخا دُرّ گرانی دفن ایدورم
علی سزادی قویا داغ دل اورک باشنا
بیر عالمین بویی داغ نهانی دفن ایدورم
گلون گوزون آنازی زینبیم حسین و حسن
گلون وداع ایلیون باغبانی دفن ایدورم
خدا بولور اورگیم دوزموی دیزیم گلمور
ستاره سهلیدی بیر آسمانی دفن ایدورم
صبا پیمبره مندن یتور سلام دینه
سنون امانتیوی جاودانه دفن ایدورم
نه گل آچار نه چمن، لاله نین چراغی سونر
بهاره ذوق ویرن گلستانی دفن ایدورم
جهاندا جان جهانیم، جهان جانیم سن
سنیله بو گجه جان جهانی دفن ایدورم
نجه سولان یوزیوی من قویوم تراب اوسته
اینانمورام سنی من جاودانی دفن ایدورم
امید و عشق بهشت و جنان روحوم سان
بهشتی روحومی عشق جنانی دفن ایدورم
تمام عالم امکانین آشناسینه باخ
غریبه لر کیمی یوخ بیر نشانی دفن ایدورم
گجه یارالی سنی قبره تاپشورام هیهات
سنی مزاره قویوب مرتضانی دفن ایدورم
- جمعه
- 9
- مهر
- 1400
- ساعت
- 21:42
- نوشته شده توسط
- یوسف اکبری
ادامه مطلب
