ای صاحب زمانه وی حجّت خدا
عجّل علی ظهورک، مولا لَکَ الفِدا
ای مظهر صفات خداوند سرمدی
وی قدرتی مروّج دین محمّدی
ای برج آسمان ولایتده آفتاب
تا کی جمال مهر جهان تابیده حجاب
ای مطلع فیوض الهی خلایقه
ای برق تیغی خرمن اعدایه صاعقه
ای قهر و لطف قاهر و غفّاره واسطه
مضطرّلر پناهی، یدا... باسطه
ای ذوالفقاری عزّت قانون احمدی
ناموس دهر، قائم آل محمّدی
چوخ قویما قلبی شیعه لرین دردیله دولا
قالمور او قدر دین مبین پایمال اولا
اسلامه کفر غالب اولوب یوخدی دادخواه
اسلامیانه کیمسه تاپولمور اولا پناه
اعدای دیندن یتیشور دینه چوخ خلل
انجلیان تاپوبدیلا قرآنیانه اَل
بیر پایه ده جسارت ایدوب قوم بی حیا
ناسخ یازولّا مصحفه کفّار برملا
مملوّ ایدوبدی یر یوزینی ظلم سر به سر
گَل دولدور عدل و دادیله ای شاه دادگر
بدعت قویولّا دین مبین اوسته گون به گون
قرآن ندور، دیولّه بو ایشلردن اَل چکون
موهوم ایش بُلولّه حسینون زیارتین
گَل انتقامین آل بیله بیر ظلم و بدعتین
غافلدولر ولیک ایا صاحب الزّمان
اجداد طاهرینون ایدوبلر بیله بیان
فِی الدَّهرِ عارِفاً بِحُسَینٍ وَ حَقَّهُ
مَن زارَهُ یَکونُ کَمَن زارَ رَبَّهُ
هر کیم حسینه ایستوری قورسون اساس غم
بی شرملر وورولّار اونا طعنه دم به دم
جدّون حسین قانیله دینه ویروب رواج
ایلوبدی روشن عالم آرا دینی چون سراج
قان بحری گَلدی کرب و بلاده تلاطمه
دین اوسته قانه باتدی حسین ابن فاطمه
بیر کیمسه اولمادی او گوزل جسمی دفن ایدن
قالدی یارالی نعشی قوری یرده بی کفن
ترویج دینیدی سبب ای شاهِ کُن فَکان
مطبخ سرایه گیتدی حسین باشی میهمان
بیر باشی که آناسی قویاردی گُل اوستونه
خولی اوتانمیوبدی قویوبدور کُل اوستونه
دوتموشدی پرده پرده قان اول سرورین یوزین
یاتدی کُل اوسته چولقالادی کُل یوزین گوزین
شیعه اولان نجه دایانار بیله نسگله
قانلی محاسینی بَلَشوب تازه دن کُله
گَلدی آناسی گوردی کُل اوسته اوغول باشین
بی اختیار توکدی یوزه قانلی گوزیاشین
اود دوتی قلبی کینه ی قوم شروریدن
اول نازنین باشی چخادوبدور تنوریدن
باخدی او باشه گوردی که بی حد بلاسی وار
اون یتدی یرده نیزه و خنجر یاراسی وار
عُسر شهادتی ایلیوب فکر وصل یُسر
منشقّ ایدوبدی قانلی باشین مالک ابن یُسر
باخدوقجا محنتیله دولوبدور او قلب پاک
گوردی ووروبلا سنگ، اولوب سجده گاهی چاک
یالقوز نه سجده گاهین ایدوبدور شکست سنگ
وورموش نُمِیرون اوغلی حُصَین آغزینا خدنگ
قلب بتولی ایلدی اول حالتی ملول
سسلندی کیم سالوب سنی بو حالته اوغول
بیر عمر بسلدیم باشیوی سنبل اوسته من
کُل باشیمه نجه گوروم ایمدی کُل اوسته من
اهل جفایه ویرمدون آیا اوزون نشان
ایتدی سنه بو قدر جفا قوم کوفیان
ویردی جواب ویردیم آنا من سنی نشان
ووردی یارالی حلقیمه نوک سِنان سَنان
ایتدی سوال اوغول هانی بس زینب حزین
ویردی جواب اسیر ایلیوبدور سپاه کین
یانمیش چادردا مسکن ایدوبدور او بینوا
باشه یغوبدی عترتیمی، ساخلیوب عزا
ایتدی سوال اکبر و عبّاسیوه نولوب
ویردی جواب اولار آناجان غرق خون اولوب
بو سوزلریله فاطمه نین طاقتی گیدوب
ایوای اوغول دیوب، یخلوب تا که غشّ ایدوب
هوشه گَلَنده اولدی دل افکار تازه دن
نطقه گَلوبدی باشلادی گفتار تازه دن
سویلوب گَلوردوم ایمدی اوغول شاهراهیدن
دشت بلاده دوشدی یولوم قتلگاهیدن
گودال قتلگاهه نظر ایلینده من
گوردوم که قطعه قطعه دوشوب اوردا بیر بدن
اجزای جسمینی ووروب اشرار بیر بیره
اوراق ایدوبدی گُل کیمی آت دیرناقی یره
بیر اوزگه حالته اونی دشمنلری سالوب
ترکیبینی پوزوبدولا بیر نقشه سی قالوب
اوخ پارچاسی، قلج سینیقی، نیزه پاره سی
اولموش او آسمان ولایت ستاره سی
بو سهلیدور که گُلشنینه باد ظلم اَسوب
بیر بی حیا بیلَکدن ایکی اللرین کَسوب
جسمون گوروب او نوعیله، اولدی گوگُل ملول
گَلدیم گوروم باشون نجه حالتده دور اوغول
آچ قان دولان گوزون منه، ناز ایتمه بیر بیله
آخِر قوناقووام، منه بیر خوش صفا ایله
عالمده کیم ویروبدی بو ظلمی اوغول نشان
مهمان یاتا تنوریده، قصرینده میزبان
قانیله کُل دوتوبدی اگرچه بو گُل یوزون
چوخ مایلم ولی آچاسان قان دولان گوزون
ویردی جواب منفعلم بو سوالیدن
قانلی گوزوم آچلموری گیچ بو خیالیدن
بو سوزلرون سنون آناجان سهل سانمورام
قانیله کُل دولوب گوزیمه، گوز آچانمرام
مین ایل اگر بو شرح مصیبت اولا رقم
ممکن دگل حسینی تمامه یته بو غم
توک گوز یاشون عذاریوه گَل داد و شیونه
بلکه توجّه ایلیه جدّون حسین سنه
نه دکتر و نه لازم اولا اوزگه بیر دوا
بو درد بی دوایه اوزی لطف ایده شِفا
- شنبه
- 3
- مهر
- 1400
- ساعت
- 20:51
- نوشته شده توسط
- یوسف اکبری
ادامه مطلب
