مبارک نامی دنیاده بیزه نور هدایتدی
کیمین یوخ زینبه عشقی علامت از حماقتدی
خانیم لاردان بیری اولسا امام شیعیان بیرگون
فقط زینب ائدوب ثابت سزاوار امامتدی
یازا بیلسم اگر بیر قطره اقیانوس زینبدن
گرک شاکر اولام شامل منه لطف و عنایتدی
سیغیشماز دفتر شعره اونون اندازه ی صبری
دئسم دریای صبریدی معاذالله جسارتدی
اولوب زهرا ائوینده درس عشقی مو به مو ازبر
علیدن آلدیقی درسلر شهامتدی عدالتدی
حسیندن اورگشوب باش اَیمیه ظلمین قباقینده
امام مجتبی مثلی خطیب با مهارتدی
دئمه قول باغلی گتدی شامه سرافکنده و نالان
قفسده حبس اولان شیرین سسی صوت شجاعتدی
اولوب تا روبرو فاسد امیره غیرتی جوشدی
گوروبلر زینبین حالی دونوبدور آیری حالتدی
چکوب شمشیر نطقین ویردی برهم بزم اعدانی
دئدی یوم آغزوی ظالم سنون قصدون اهانتدی
خیالونده حسینی ئولدوروبسن بیلموسن اما
حسینین گوزلری روشنگر اصل حقیقتدی
گوزلّیکدن سورا کرب و بلاده گورمَدیم والله
بیزیم مکتبده اوّل درسیمیز شوق شهادتدی
آخی مرجانه نین اوغلی ندن فخر ایلوسن بیخود
الان دوزدی یِرون کاخ مجللدی عمارتدی
ولیکن پیکرون آتشده عقبادن خلاص اولماز
جهنمده یِرون حاضر،خیالون ایندی راحتدی
گلوب اموال ملتدن اولوب پرورده اندامون
طعامونده حلال اولماز. شرابونده نجاستدی
بلی مرجانه نین اوغلی امیر سر به راه اولماز
سنه رهبر دِیَن ملت ئوزون تک بی کفایتدی
یاراشمیر هئچ منه صحبت ائدم ابن زیادیله
قباقونده دوران عورت ولیُ اللهَ زینتدی
بابام پیغمبر خاتم،آتام فتاح خیبردی
اوزوم استاد ایّوبم، آنام گنج نجابتدی
غیور الله بنی هاشم اِئلین بی عیب خلق ایلوب
منیم قارداشلاریم باشدان باشا بیر پارچا غیرتدی
قباقوندا اولان باشی ملائک لر طواف ایلور
گورَن گوز اولسا جسمونده بیلرسن نه قیامتدی
او باشین صاحبی اللی بش ایلدی دل نوازیمدی
او باشه ایلمه توهین رقیم غرق محنتدی
یانوبدی خیمه سی، اهل و عیالی ده اسیر اولدی
اگرچه تشنه جان وئردی، ولی دریای حکمتدی
او لبلر جایگاه سوره ی رحمان و یاسیندی
او باشه خیزران ویرما، دگوب داشلار جراحتدی
قلم گوزلر دولوب بسدی تمام ایله سوزی باغلا
حسین و زینبین دردی فراتر از روایتدی
- چهارشنبه
- 22
- بهمن
- 1399
- ساعت
- 21:46
- نوشته شده توسط
- یوسف اکبری
