گوردی زینب وئردی دین اوسته حسین قربانلارین
تز اودا گتدی صف عشقه دوزوب اوغلانلارین
یا حسین سسلندی ای گل واژه ی رحمت منه
سن منیم پیر مرادیمسن مریدم من سنه
وئرمشوک بیز قول بذل جان خدای ذوالمنه
با هم امضا ائتمشوک منظوم اولان دیوانلارین
من بو سوداده شریک اولدیم سنه روز الست
قویمارام وئرسون زمانه عشقیمه حاشا شکست
باده ی وحدت ایچیب اولدی جوانلاریمدا مست
رخصت ایستورلر حقه قیلسونلار اهدا جانلارین
اکبرین نعشی عباده قانینه غلطان یاتیب
قاسم شهزاده خاکیله اولوب یکسان یاتیب
هر بیری بیر گوشه ده یارانوی ویلان یاتیب
پیشواز ایلوب بابام جنّتده دین مهمانلارین
زینبی مام شهیدان ایچره ائتمه شرمسار
خوشلارام مندنده اولسون بو مناده یادگار
بو ایکی قربانی گل تز سال یولا ای شهریار
راحت ایله دلشکسته ناگران وجدانلارین
همسر محبوبیمی ترک ایلین لحظه اخا
اختیار تامّ عطا ایلوب منه اول با وفا
سویلدی جان لازم اولسا قویما تک قالسین آقا
یاد ائدیب مندنده قیل هدیه حسینه قانلارین
وئر اجازه مقدمون بوس ایلسین آهولریم
غیرتیندن گور نجه لرزه دوتوب کوکولریم
اولما شایسته دگول قربانلیقا مه رولریم
نا امید ائتمه قبول ایله قلیل احسانلارین
التماس ایلوردی زینب تا آلا اذن جهاد
عاقبت اولدی موفّق خواهر نیکو نهاد
گیدریب حاصل کفن عون و محمّد اولدی شاد
تیغلر الده حمایل قیلدیلار قرآنلارین
چکدی سرعتله ایکی اوغلین خانم زینب دالا
مجلس تودیع سرپایی قوروب اوچ باولا
یوزلریندن اوپدی شیرین دیللرین سالدی یولا
واردی انجامینده آرامش دئدی طوفانلارین
غربت اولکه سینه داغلی هم کمکسیزدی دایوز
شافع محشردی یار اولسوز اولار جنّت پایوز
خوشدل اولّام حربه لر آلتیندا چخسا آخ وایوز
آرزوسی وار بو توفیقه بصیر انسانلارین
راضی اولسون سیزدن آللّه سیز اوجالتدوز باشیمی
سرفراز ائتدوز منی هم باغری قان قارداشیمی
سیز گئدوز منده دالوزجان قوی سپیم گوز یاشیمی
منتظر ایلشدی گورسون نعش خون افشانلارین
توسن عشقه سوار اولدی ایکی سرباز عشق
بیر بیریندن سبقت آلدی گه ایکی جانباز عشق
چاتدیلار میقات عشقه چون ایکی شهباز عشق
توکدیلر هل من مبارز کلمه ی سوزانلارین
حمله ایلوبدی ایکی قارداش صفوف کافره
بیر بیره دگدی جناح میمنه هم میسره
تلّون اوستوندن باخوردی زین اَب آهولره
گوردی گلناری سراپا سینه ی شان شانلارین
سسلدی قارداش یخیلدی زیندن ترلانلاریم
گل گورک هاردا بویاندی قانینه قربانلاریم
قویمیاق پر پر ایاق آلتدا اولا ریحانلاریم
حمل ائدک اخیامه نعشین با وفا جیرانلارین
سختدی تنها خیامه قیترم پیکرلرین
ممکن اولسا گل برادر وئر حمایت اللرین
باجنون قارداش یامان گونده دوتار بال و پرین
یوخدی عبداللّه جعفر دفن ائدک اصلانلارین
قوی دیوم عبّاسده گلسون بیزه همراه اولا
خوشدی تشییع جنازه چوخ مجلّل جاه اولا
فخر آل اللّه ننگ فرقه ی گمراه اولا
بو آخان قانلار گوروم پوزسین عدو سامانلارین
اوخشیوب من آغلاسام عیب ایلمه ای مه لقا
اکبرین نعشین گورنده سن دوشندون تپراقا
سن آتیدون منده مادر ای شهِ ملک بقا
دوتموشام دیدار آخردور اودور دامانلارین
عفو ائله ای سرور بطحا منِ نالانی سن
اولمادی شایسته هدیم ای عزیز پنج تن
اکبرین بیر طُرّه ی تارینه اولمازلار ثمن
راضیم چکسم ئولنجه درد بی درمانلارین
آی حسین عشّاقی جنّت بی ملال اولسون سیزه
وئردیگیم صود چکدیگیم زحمت حلال اولسون سیزه
یاره لر درگاه حقده چون مدال اولسون سیزه
طیّ قیلدوز قهرمانلار تک بلا دورانلارین
گلشن عشقی گوزل سیر ایلدوز چیخدوز باشا
آرخا دوردوز شاه دینه آفرین سیز قارداشا
گر چی خنجر یاره سی گورّم انیب باشدان قاشا
یانمارام سودوز جهاد اکبرین برهانلارین
واقفم اسرار بو یوم بلادن ماحصل
درک ائدر مردان حق از پیر تا کودک اجل
یوخ منه غمدن صورا بیر آیری صندوق اَمَل
چوخ رجالون غملرینده سهمی وار نسوانلارین
دولت عشقون بهار انجلاسیندن خوشام
گر چی اندوه مصائبدن وجوداً ناخوشام
یدّی قارداش وئرمیشم الدن گرک غمدن جوشام
اجر شایان آلموشام حقدن دوزم هجرانلارین
عشق زیبادی اگر اولسا حقیقی نیّتون
یاز "صفا" نوحه حسینه پارلاسون حیثیّتون
صادق القول اول ثبوت اولسون حقه عبدیّتون
کاتب حق کاذبین عصیان یازار پیمانلارین
- دوشنبه
- 4
- مرداد
- 1400
- ساعت
- 16:46
- نوشته شده توسط
- یوسف اکبری
ادامه مطلب
