روز ازّل طرح اولاندا نقشهء پیمانِ عشق
زینب آدی اوُلدی باشدا زینتِ عُنوانِ عشق
انبیاء طومارِ عشقه ایتدیلر بیر بیر نگاه
کیم اِسارت کلمه سین گوردی چکوب دلدَن بیر آه
طالبانِ حُور و جنّت اسدیلر چون پِرَّ کاه
گزدی اللّرده مَعلق نامهء سلطانِ عشق
انبیادَن ردّ اُولوب باخدی صُفوفِ اُولیاء
اُولمادی هیچ کیم دَه گویا قدرتِ نِطق بلی
تا حسین گُوردی بیوردی البلاءُ للولاء
چخدی صف دَن عاشقِ جانباز و دست افشانِ عشق
بیر تقاضا ایتدی امّا محضرِ داداری دَن
لو آغیر تکلیفی دور عذر ایستورم گُفتاری دَن
بیر شریک ایله مُعینِ عترتِ اطهاری دَن
کامل اولسون اَمرون اِجرا قالماسون نقصانِ عشق
سس گلوب دور یا حسین منظور اگر یولداش دادی
عشقی بول سن بش یِره دوردی باجی قارداش دادی
نامیه دقّتله بیر باخ زینب آدی باش دادی
تاپشورول موش زینبه اطفالِ سرگردانِ عشق
ویرمشوک درسین ازل دَن زینبون تکمیلی دی
نه گوروب مَکتب نه مُحتاجِ غم تَحصیلی دی
بی مُعلّم جُرعه نوشِ چشمهء تنزیلی دی
حلّ اولار زینب اَلیله مشگل و آسانِ عشق
الغرض تاپدی ایکی اِمضائیلن اِیش فیصله
فی سبیل الله باجی قارداش ویروبلر اَل اَله
ایچدیلر تا جُرعهء صحهبای عشقی یکدله
پوزدولار بزمِ اَلستی کهنه سر مستانِ عشق
سوز بیله قالدی وجوده گلدی اشباه اُمَم
هفتم هجرتده زینب قویدی دنیایه قدم
تا گوز آچدی آغلادی هم دم دَن ئوتری دّم بدم
اُولمادی هیچ کیم دَه ساکت طفلکِ نالانِ عشق
نه سُود اَمدی نه خموش اُولدی او نُورس بیر نفس
تا خبر یتدی حسینه داده گلدی دادرس
باجی قارداش بیر بیرین گورجک ایدوب ذُوق و هَوس
گُل گُله گُولدی آچیلدی غُنچهء خندانِ عشق
چوخ تعجب ایتمک اوُلماز قدرتِ خلاقی دَن
بوندان آرتیق انتظاریم وار بیله عشاقی دَن
قوللارین زینب چیخاتدی داخلِ قونداقی دَن
قولبویون اُولدی ایکی پَروانهء سوزانِ عشق
دَم بدم آرتدی عَلاقه طبعِ خوگر تاپدی خو
ریشه لندی دلده عشقون تاروپودی مو به مو
اللّی دورد ئیل گزدی لَر هم دوش و هم دَم روبرو
تا گُوروندی گُوزلری نه عرصهء میدانِ عشق
صبحِ عاشورا آچلدی، آچدی عشقون پَردَه سین
اِمتحانه چَکدیلر عاشق لرون سر کرده سین
تاپدیلار بی غلُّ غَش چون فاطمه پَروردَه سین
قلبی اولدی مدفنِ گنجینهء پنهانِ عشق
محضرِ شاهه گلوب عرض ایتدی ای کانِ کرم
اللّی دورد ایلدی وجودینله مباهات ایلرم
نه قسم ویرّم بیرین زَهرایه، نه آند ایچمرم
ایتمز ایجاب قسم چون حُجّتِ بُرهانِ عشق
ایندی وار بیر خواهشیم سالما یِره فاش ایلسم
راضی اولما ریشهک گفتاریمی بیردَن کسم
من سنی ویرّم آنام صدیقه زَهرایه قسم
نا امید ایتمه منی ای رهبرِ مردانِ عشق
زینبون بو خواهشی زَهرا آدی اولدی سبب
آغلادی شدتله غم دَن اول شهِ عالی نسب
ایتدی فرمایش ندور منظورون ای کانِ اَدب
خواهشون ردّ ایتمرم ای منبعِ ایمانِ عشق
آغلاما باجی بیان قیل دردون اوُل بیر لحظه رام
ایندی که زَهرایه آند ایچدون نه ایستورسن وارام
بیر فقط سو ایسته مه اولّام خَجالت آغلارام
چون سوسوزلوقدان سارالمش گُلشنِ بستانِ عشق
آغلاما ایسلاتما ابرین دامنین گوز یاشوه
دردوی روشن بیان ایله حسین قارداشوه
اولمیا شُوقِ وطن دوشموش بو چولدَه باشوه
یا چوخ اینجیتدی سنی اندوهِ بی پایانِ عشق
ایستوسن قیدِ اِسارتده حرام اولسون سنه
قیتریم گیت جَدّی مون شهری مَقام اولسون سنه
اکبریم گلسون رکابین دَه غلام اولسون سنه
خاکسار اوُلسون قاپوندا یوسفِ کنعانِ عشق
زینب عرض ایتدی حسینیم قلبی مه وورما یارا
روحی مه سن سیز وطن زنداندی جَنّت بی صَفا
خواهشیم بیر خوردا خواهش دور قبول ایله اَخا
قول ویر سنگین تر اولسون کفّهء میزانِ عشق
بیر موافق قول آلوب زینب اورک دردین دیه
گوردولر هیچ دینمدی بیر باش قیتدی خیمیه
مات اولوب اهلِ حرم الله بو ایستور نیلیه
سالدی طوفان دیللّره بو مُنجیِ طوفانِ عشق
چخدی زینب خیمه دَن ناگاه بی وقت و مَجال
اَل اَله بدرِ تمامیلن ایکی پُوزقُون هِلال
شیر زَن بیر شیر تک هر پنجه سیندَه بیر مارال
ظاهراً اوّلادِ جَعفَر باطناً طفلانِ عشق
گوردیلر طرح ایلیوب زینب گُوزل برنامه لر
گیدروب اوغلانلارا آغ پیرهن خوش جامه لر
باشدا چون عنوانِ شَخصیّت یاشیل عَمامه لر
قُوسِ ابرولر کمان، مژگان لاری پیکانِ عشق
شاهی گورجَک ویردیلر رُخصت او دَم گوزیاشی نه
سبقت ایلور خورداجا قارداش بیوک قارداشی نه
هر اوُچی بیردَن دولاندیلار حسینون باشی نه
آخ گُوریم آباد اوُلیدی خانهء ویرانِ عشق
زینبون آندیله، عبداللهِ جَعفَر نامه سی
بُهت و حِیرتدَه قویوب ناچار شاهِ بی کسی
بیر بیر ئوپدی باغرینا باسدی او ایکی نورسی
چوخ تفأل ایتدی گوردی خوش گلور قرآنِ عشق
الله الله عقل حیران دور بَتُولِ ثانیه
قویمادی قربانلاری تأخیر اِیده بیر ثانیه
آشنالردن آییردی یوللّادی بیگانیه
اولدی پای اندازِ جانان هستیِ امکانِ عشق
اندیلر میدانِ جنگه چون او عُنقا بچّه لر
جَعفَرِ طیار تَک زینب دَه آچدی بال و پَر
سسلنوبلر ای گروهِ بد سُگال و بد سیر
عادتوز مَکر و جفا دور طاعتوز خُسرانِ عشق
الغرض بیر حمله سینده بو ایکی یورقون بالا
قویمادی میداندا آخر بیر مُنظّم صف قالا
گه آچوللار فاصله گاهی ویروللّر دال دالا
سَسلنولر حافظ اوُل ای قادرِ صبحانِ عشق
سَسلنوبلر عرصه تَنگ اولجاق بابا یا مُرتضی
دستگیر اُولماق بیزه ذلّتدی سَن اُولما رضا
دوشمُوشوک تنگهِ کَمند ایستور آتا دستِ قَضا
زنده صید اوُلسا قبول اوُلماز بابا قربانِ عشق
بیر قدَر دَعوا ایدوب سوزِ عَطش دَن یاندیلار
هر یِره یوز قوی دولار دورت سَمتی دَن اوخ لاندیلار
فاصله دوشدی آرایه تکلنوب دوغران دیلار
قانه غَلطان اولدی تک تک گُوهرِ غلطانِ عشق
گه بیری سَسلور حُسینی لبلرین دَن قان گلور
گه بیری نیم خیز اولور گورسُون او سَس هاردان گلور
ردّ ایدور بیر نیزه نی یوز ناوکِ پَرّان گلور
سَسلنور اِمداده گل اِی خسروِ خوبانِ عشق
شَه گلوب گوردی باتوب القانه خواهر زاده لر
نقد جانی زاد راهِ عشق ایدوب آزاده لر
سینهء شاهه اوجالدی عاقبت اُفتاده لر
قان لاریلان اولدی امّا صحبتِ جریان عشق
شَه گلینجه زینب امّا قوردی شُورا خیمه دَه
قیزلارا بیر سوز بیُوردی اِیتدی غُوغا خیمه دَه
سیز چیخون من اگلشیم خامُوش و تَنها خیمه دَه
قارداشیم خِجلَت چَکر الدَن گِیدر دامانِ عشق
اوّلاً سیزده منیم تک پیشوازه قاشمِیُون
دوزمسه قلبوز قاچون سعی اِیلیون باش آشمیون
سیز بیلون الله اوجادان اوخشیوب آغلاشمیون
اولماسون دِلگیر و مَحزون شاهِ مَظلومانِ عشق
ای ایدن درگاهینه گُلدستهء گردون رکوع
وی مه و مهره اِیدن حکمِ غروب امرِ طلوع
لطف قیل زوّارون امرین اِیله عبّاسَه رُجوع
باغلانان یوللّاری آچسون فارسِ شَجعانِ عشق
- شنبه
- 14
- مرداد
- 1402
- ساعت
- 23:04
- نوشته شده توسط
- یوسف اکبری
ادامه مطلب
